“მამიდამ სახლი წაგვართვა, ჩვენი ბარგი კი მეზობლებთან ჩაიტანა”

16 წელი სახლი მქონდა, 16 წლისამ კი დავკარგე. ახლა უსახლკარო გოგო მქვია, მაგრამ ამას სკოლაში ვერ ვამხელ. კლასელები ძალიან მიყვარს, მათთან ახლოს ვარ, მაგრამ მაინც მერიდება, ვუთხრა, რომ მე და ჩემს ოჯახს საკუთარი ჭერი აღარ გვაქვს.

დიდი ოჯახი გვქონდა – ჩემი მშობლები, და-ძმა და მამის მშობლები ერთად ვცხოვრობდით. ერთი მამიდა მყავს, რომელიც გათხოვილი იყო. ქმარი სანამ ჰყავდა, ყველანი მშვიდად ვიყავით, ორი წლის წინ ოჯახი დაენგრა და ჩვენი პრობლემებიც სწორედ ამის შემდეგ დაიწყო.

მამიდა თავის ორ შვილთან ერთად ჩვენთან გადმოვიდა საცხოვრებლად. თავიდან ამბობდა, რომ მისი ქმრის სახლიდან წილს აიღებდა და ცალკე გადავიდოდა, მაგრამ ასე არ მოხდა.

დედამ მული ძალიან თბილად მიიღო. მე და ჩემი და-ძმაც გაგვაფრთხილა, ბავშვები ტრავმირებულები არიან და მოეფერეთ, მდგომარეობა შეუმსუბუქეთო. ასეც ვიქცეოდით, მაგრამ რამდენიმე ხანში ჩხუბი აქეთ დაგვიწყეს. მამიდამ მთელი ის აგრესია, რაც ქმრის ოჯახში ჰქონდა დაგროვილი, ჩვენზე გადმოანთხია. განსაკუთრებით დედაჩემი ამოიჩემა. მისი დანახვაც აღიზიანებდა.

ბოლოს იქამდე მივიდა, რომ მშობლები თავის მხარეს გადაიყვანა და დედაჩემს ერთად დაუპირისპირდნენ. პირდაპირ გამოგვიცხადა, ჩემი მშობლების სახლში მასპინძელი მე ვარ, სტუმრად თქვენ ხართო. რა თქმა უნდა, დედა შეეპასუხა და მამიდას სწორედ ეს უნდოდა, დაიწყო ჩხუბი, რომელიც არაფრით დაამთავრა. დედაჩემს ყოველდღე ლანძღავდა.

ბებიაჩემს თავისი რძალი ძალიან უყვარდა, მაგრამ მამიდამ ხასიათი მასაც შეუცვალა. მამაჩემის მშობლები გვეუბნებოდნენ, აქ რაც არის, ყველაფერი ჩვენი ქალიშვილისაა, ის უპატრონოდ დარჩა, ამიტომ ყველაფერს მას ვაძლევთ, თქვენ რაც გინდათ, ის ქენითო. დედაჩემს ეუბნებოდნენ, შენ ქმარი გყავს და მოგხედავს, ჩვენს გოგოს კი უპატრონოდ ვერ დავტოვებთო.

ერთ დღეს სახლში რომ მივედით, კარი ვეღარ გავაღეთ, საკეტი დაგვხვდა გამოცვლილი. ჩვენი ბარგი კი პირველ სართულზე, მეზობელთან იყო ჩატანილი. მამამ კარის საკეტის შემტვრევა დაიწყო, მაგრამ მამიდამ პატრული გამოიძახა.

ასე გამოგვრეკეს სახლიდან და ახლა ნაქირავებ ბინაში ვცხოვრობთ.

მამა ამბობს, შეიძლება სხვა უბანში ბინა უფრო იაფად ვიქირაოთ და ადგილის შეცვლა მოგვიწევსო. ეს იმას ნიშნავს, რომ სკოლის გამოცვლაც მომიწევს და მეგობრებსაც ხშირად ვეღარ ვნახავ. მამიდამ მთელი ჩვენი ცხოვრება შეცვალა უარესობისკენ.