სპეციალისტები გვაფრთხილებენ, რომ ხილის წვენები, რომლებიც ქარხნულად არის დამზადებული, აღარ მიიჩნევა ბავშვისთვის აუცილებელ და სასარგებლო სასმელად და მათი აქტიური პროპაგანდა მარკეტინგული ხრიკია და სხვა არაფერი.
საქმე ის გახლავთ, რომ ხილის წვენის თითოეული ჭიქა 6 ჩაის კოვზ შაქარს შეიცავს, რაც იმაზე მეტიც კია, ვიდრე კოკა-კოლაში.
შაქრის დიდი რაოდენობა ავითარებს დიაბეტს, სიმსუქნეს, კბილის კარიესს და ა.შ. ამიტომ ხილის წვენები ბავშვს იშვიათად, კანფეტისა და სხვა ტკბილეულის ალტერნატივის სახით უნდა მივცეთ.
მშობელს უნდა ახსოვდეს, რომ ხილის წვენი ბავშვს ჩვეულებრივ, სასმელ წყალს ვერ შეუცვლის, რომელიც ნივთიერებათა ცვლისთვის აუცილებელია. გახსოვდეთ, რომ წყურვილის დროს წვენის დალევისას ეფექტი საპირისპირო იქნება.
პროდუქციის ეტიკეტზე მითითებული წარწერა – „შაქრის შემცველობის გარეშე“, კიდევ უფრო დამაფიქრებელია, რადგან ხელოვნური შაქრის შემცველების არსებობაზე მიუთითებს, რომელთა მავნებლობა დიდი ხნის წინ აღიარეს (E950 კალიუმის აცესულფამი, E951 ასპარტამი).
ამგვარად „შეზავებულ“ წვენებს შეუძლია ალერგიული რეაქციების, დიარეას, დისბაქტერიოზისა და კუჭ-ნაწლავის სისტემის დაავადებების გამოწვევა.
ბრიტანელი სტომატოლოგები გვაფრთხილებენ, რომ მაღალი მჟავიანობის გამო ხილის კოქტეილები ბავშვის კბილებისთვის ტკბილეულზე უფრო სახიფათოა. მჟავა კბილის ემალზე ბზარებს აჩენს, სადაც ბაქტერიები იბუდებენ, და ყველაფერი კარიესით მთავრდება.
გახსოვდეთ, რომ ხილის წვენი ნაკლებ სასარგებლო ნივთიერებას შეიცავს, ვიდრე ხილი, ამიტომ გაცილებით სასარგებლო იქნება, თუ ბავშვს, წვენის ნაცვლად, ცოცხალ ხილს შესთავაზებთ.
გამოდის, რომ ხილის წვენები მავნებელია? რა თქმა უნდა, არა. მცირე ოდენობით წვენს მხოლოდ სარგებლის მოტანა შეუძლია, მაგრამ წვენებმა ბავშვს წყალი და ხილი არ უნდა შეუცვალოს.
მშობლებს ვურჩევთ, რომ წვენების შერჩევისას უპირატესობა 100%-ით პასტერიზებულ წვენს მიანიჭონ და არა – შაქრით შეზავებულ სასმელებს.
6 წლამდე ბავშვისთვის დღეში 200 მლ-ზე მეტი წვენის მიღება რეკომენდებული არ არის, ამიტომ ნუ შეაჩვევთ მას მთელი დღის მანძილზე წვენის მიღებას. მიეცით წვენი ფინჯნით და არა პაკეტით ან ბოთლით.
