ვისაც სახლში რემონტი ერთხელ მაინც გაუკეთებია, იცის, პარკეტის მოხვეწა ან შეცვლა როგორი რთული და ძვირი სიამოვნებაა.
დროთა განმავლობაში, პარკეტი პირვანდელ სახეს კარგავს, თუმცა ეს არ ნიშნავს, რომ მდგომარეობის გაუმჯობესება შეუძლებელია. ჩვენ გიამბობთ, როგორ დაუბრუნოთ პარკეტს პირვანდელი სახე მარტივი ხრიკების დახმარებით.
- ნაკაწრები და მიმხმარი ჭუჭყი
თავდაპირველად, პარკეტის ზედაპირიდან ნაკაწრების მოცილებაზე უნდა იზრუნოთ. ამისთვის სამშენებლო მასალების მაღაზიებში იყიდება სპეციალური პასტა. მთავარია, პასტის შეძენის დროს, თქვენი პარკეტის ფოტო ან ნიმუში თან იქონიოთ, რათა ფერების დამთხვევა შეძლოთ.
პარკეტს საღეჭი რეზინი, კანფეტი ან მაგრად ჩამჯდარი პლასტელინი რომ მოაცილოთ, პოლიეთილენის პარკში ჩაყარეთ ყინული და დაზიანებულ ადგილზე მოათავსეთ. 20 წუთის შემდეგ ჭუჭყის მოცილებას მარტივად შეძლებთ.
ნაკაწრებისგ ან დასაცავად პარკეტს დამცავი ფენა სჭირდება, ამიტომ ეპოქსიდის ან აკრილის ლაქი უნდა გადაუსვათ. ერთი დღის შემდეგ, ლაქი გაშრება, ხოლო პარკეტი პირვანდელ სახეს მიიღებს.
- ჭრაჭუნი
თავდაპირველად, ოთახში ჰაერის ტენიანობა უნდა გაზომოთ. თუ ის 60%-სა და მეტს შეადგენს, ერთადერთი გამოსავალი პარკეტის შეცვლაა, თუმცა რამდენიმე წელიწადში იგივე განმეორდება. მოხსენით „პლინტუსები“ და დამჭერები შეამოწმეთ.
თუ ისინი არაფერს იჭერს, შეცვალეთ და კარგად დააჭედეთ. კარგი იქნება, თუ ყოველდღიურად დააჭედებთ, სანამ უსიამოვნო ჭრაჭუნი არ გაქრება. პარკეტის ფიცრებს შორის გაჩენილი პატარა ღრიჭოები ფიცრის ნატეხებით ამოავსეთ და ლაქი გადაუსვით.
- ამობერილი პარკეტი
ამის გამოსწორება შეიძლება, თუ პარკეტზე ძალიან ბევრი წყალი არ დაღვრილა და შემთხვევიდან 2 კვირაზე მეტი არ არის გასული, რადგან ამ დროის შემდეგ დასველებულ ადგილზე სოკო ჩნდება და აუცილებელია სპეციალური საშუალებებით მისი დამუშავება.
პარკეტის ამობერილი ადგილი, დაახლოებით, 90 წუთის განმავლობაში ფენის ცხელი ჰაერით გაახურეთ. ცხელ პარკეტზე დააფარეთ ქსოვილი და დაადეთ სიმძიმე – კვადრატულ მეტრზე 10 კგ.
ერთი დღე-ღამე ასე გააჩერეთ და თქვენი პარკეტი ახალივით გახდება.
